Едно од најнепријатните искуства на првиот состанок е кога ќе се појавите и веднаш ќе сфатите дека вие и другата личност едноставно не си одговарате. Понекогаш тоа чувство се појавува интуитивно, а понекогаш станува јасно низ разговорот, кога ќе откриете дека имате различни вредности или ќе забележите однесување што не ви се допаѓа.

„Еден од најголемите митови за прекинување на лош состанок е верувањето дека мора да поминете неколку часа со некого само затоа што таа личност ја платила вечерата или се согласила да излезе со вас. Не мора да биде така“, вели Бри Темпл, главна оперативна директорка и главна посредничка за запознавање во компанијата Токвифи, пишува „Вајс“.

Таа објаснува дека почитувањето на чувствата на другата личност не значи дека треба да ги занемарите сопствените потреби.

„Може да бидете целосно искрени, а притоа да ја намалите можноста некого да повредите, наместо непотребно да го продолжувате состанокот ако шансите за успешна врска изгледаат многу мали“, додава Темпл.

Сепак, предвременото завршување на средбата може да изгледа непристојно, непријатно, па дури и ризично, зависно од ситуацијата. Експертите издвојуваат три начини како тоа да го направите со почит и разбирање.

1. Бидете директни

Најдобриот и најљубезниот начин да го прекинете лошиот состанок е едноставно да бидете искрени, без да оставате простор за погрешни сигнали. Директноста не значи грубост, особено ако комуницирате со почит и внимание.

„Може да кажете дека ви било драго што сте ја запознале личноста, но дека мора да заминете бидејќи утредента ве очекува рано станување. Така ќе можете на убав начин да го завршите разговорот без да ги повредите чувствата на другиот“, советува Темпл.

Таа додава дека сосема е во ред и ако уште на почетокот сфатите дека нема никаква романтична можност и одлучите да си заминете, а подоцна да испратите љубезна порака.

Сепак, не е препорачливо едноставно да станете и да си заминете без објаснување, освен ако не се чувствувате загрозено или непочитувано. Најдобро е однапред да бидете искрени.

2. Искористете природен момент за заминување

Темпл советува дека понекогаш најлесниот начин е да го искористите природниот тек на разговорот за да ја завршите средбата.

„Многу често луѓето премногу размислуваат како на најубав начин да го прекинат разговорот. Всушност, заминувањето без срам или непријатност често остава најдобар впечаток“, објаснува таа.

Сепак, ова не се однесува на ситуации во кои разговорот станува непријатен или опасен. Ако имате лошо чувство или се чувствувате несигурно, најдобро е веднаш да си заминете, без да се грижите дали тоа ќе изгледа непристојно.

„Ако разговорот стигне до точка во која се чувствувате непријатно, на пример ако се чувствувате загрозено, навредено или непочитувано, можете веднаш да кажете дека мора да заминете, без дополнително да објаснувате зошто“, вели Темпл.

3. Не обидувајте се на сила да создадете привлечност

Ако не чувствувате поврзаност, не се преправајте дека постои. Уште поважно, не обидувајте се вештачки да создадете хемија, бидејќи тоа може само да ја збуни другата личност и да доведе до уште понепријатно или одложено заминување.

„Треба да се разбере дека не е потребно да се создава лажна хемија само за да не се разочара другата личност. Не треба да го поминете целиот состанок обидувајќи се да ѝ покажете на некја личност колку совршено би одговарале еден со друг. Тоа не е целта на првата средба“, вели Темпл.

Според неа, прекинувањето на состанокот кога ќе сфатите дека не постои никаква поврзаност всушност е знак на почит кон другата личност.

Првата средба не мора секогаш да заврши со романтична приказна. Понекогаш најдобриот исход е искрено и пристојно да признаете дека едноставно нема совпаѓање.

Што навистина сакаат жените од своите партнери? Овие работи ги ценат, иако ретко ги кажуваат