Одлуките на судовите за поранешниот министер за внатрешни работи Наќе Чулев и уште тројца вработени во Агенцијата за разузнавање кои одлучија дека биле незаконски избркани и им биле одземени безбедносните сертификати кога Агенцијата ја водеше Еролд Муслиу, го отвора прашањето за милионски надомест кој ќе треба да им го исплати државата за нематеријална штета поради незаконските откази и повредата на угледот и професионалната репутација.

Чулев утрово објави дека по повеќегодишна битка, судот донел пресуда во негова корист и со тоа се утврдило дека тоа било политички прогон од претходната власт.

Управниот, Граѓанскиот и Врховниот суд ги поништиле решенијата на надлежните органи, вклучително и на Дирекцијата за безбедност и класифицирани информации, која се уште ја води директорот Стојан Славески.

Оштетените најавуваат и поднесување на кривични пријави против одговорните службени лица поради сомнение за злоупотреба на службената положба во АР и ДБКИ.

Чулев доби отказ додека на власт беше СДСМ, а тој беше министер во техничката влада од ВМРО-ДПМНЕ и тогаш обвинуваше дека по 25 години служба во безбедносниот систем тој бил прогласен за безбедносен ризик на државата.

-Тоа беа години на јавно понижување и дискредитација, медиумски конструкции и лажни наративи, како и силен притисок врз моето семејство и моите деца. Човек кој речиси 25 години чесно служел во безбедноста на државата и соработувал со меѓународни партнери, одеднаш беше прогласен за „безбедносен ризик“ – не поради дело, туку поради политичка одлука и затоа што јавно зборував за корупцијата и аномалиите во системот. По долгите судски процеси, судовите утврдија дека одземањето на безбедносниот сертификат и моето отпуштање биле незаконски, дека целата конструкција била неправична и политички мотивирана, а против сторителите е поднесена кривична пријава за злоупотреба на институциите, за која очекувам институциите да постапат, а сторителите да одговараат – напиша Чулев.

Агенција за разузнавање: Чулев нема добиено отказ, туку е суспендиран по решение на Дирекцијата за безбедност на класифицирани информации