Токму кога сите се надеваа на нов камбек од Ник Кирјос, тенисерот објави на социјалните мрежи дека нема да игра на Австралија опен (18 јануари – 1 февруари 2026 година).

Сепак, тој ќе настапи во двојки заедно со Танасис Кокинакис, со кого го освои овој турнир пред четири години.

– По добар разговор со Австралиската тениска федерација, решив да се фокусирам на двојки оваа година – вели австралискиот тенисер.

Оваа недела, Кирјос играше во Бризбејн за прв пат на официјален турнир од март во Мајами, но беше елиминиран во првото коло од Александар Ковачевиќ (САД).

– Подготвен сум да се вратам на теренот, но пет сета се нешто сосема друго. Сè уште не сум подготвен за таа дистанца. Подобро е мојата покана да оди кај некој друг кој е сега поподготвен од мене – објасни тој за одлуката.

Набргу по оваа одлука, АО ги додели последните три вајлд карти, за поранешниот шампион на турнирот, Швајцарецот Станислас Вавринка, и Австралијците Џордан Томпсон и Крис О`Конел.