Кичеец бил на 30-дневно отсуство од затвор поради лекарски прегледи
Зоран Милески–Кичеец, кој издржува затворска казна за случајот „Рекет” во затворот во Струга, а попладнево беше еден од учесниците во тешката сообраќајна несреќа на магистралниот пат Кичево-Гостивар, користел 30-дневно отсуство од затвор поради неодложни лекарски прегледи, велат од од Управата за извршување на санкции.
Во сообраќајната несреќа едно лице загина, а седуммина се повредени, од кои четворица потешко, поради што се пренесени на лекување во Клиничкиот Центар во Скопје.
-Со одлука на Управата за извршување санкции, лицето Зоран Милески користи 30-дневно отсуство од затвор поради неодложни лекарски прегледи. Определеното време за медицински испитувања е од 08.08 до 08.09, се вели во одговорот од Управата.
Милески казната затвор ја издржува во отвореното одделение во затворот во Струга.
-Тој веќе има издржано повеќе од половина од затворската казна и до 08.09 треба да се врати на доиздржување на затворската казна, додаваат од Управата за извршување санкции.
Милески призна вина за случајот „Рекет”, во кој се осудени и Катица Јанева и Бојан Јовановски, и спогодбено доби најниска затворска казна. Тој е осуден на три години затвор, откако во декември 2019 година го призна делото за случајот „Рекет” – примање награда за противзаконито влијание.
Извор: МИА