Ракетата „Њу шепард“, произведена од компанијата на милијардерот Џеф Безос, „Блу ориџин“, денес ќе биде лансирана во вселената со екипаж составен исклучиво од жени, меѓу кои и поп-ѕвездата Кети Пери.

Ова е првата експедиција со целосно женски екипаж од советската мисија во 1963 година. Според планот, ракетата ќе ја помине таканаречената Карманова линија – меѓународно признаената надморска височина на која почнува вселената.

Покрај Пери, во ракетата „Њу шепард“ се наоѓаат и водителката Гејл Кинг, новинарката и партнерка на Џеф Безос – Лорен Санчез, ракетната научничка Ајша Боу, активистката за граѓански права Аманда Нгујен и филмската продуцентка Керијен Флин.

Станува збор за автоматизирана ракета на која не ѝ е потребен пилот, па така сите жени се всушност патнички и нема да имаат контрола врз летот.

„Њу шепард“ ќе полета од западен Тексас во 15.30 часот по средноевропско време, а мисијата ќе трае околу 11 минути.

Пери на својот инстаграм-профил објави дека петнаесет години сонува да отпатува во вселената и дека конечно ќе ѝ се оствари сонот.

„Мислам дека ќе пеам, барем малку. Морам да пеам во вселената“, им вети пејачката на своите следбеници.