Ако викендов не се смири епидемиолошката ситуација во земјава каде се регистрираат и по 550 нови заразени со коронавирус, тогаш во понеделник Комисијата за заразни болести до владата ќе предложи во јавниот превоз да се примаат патници со преполовен капацитет, целосно да се забранат секакви настани и сите економски оператори да завршуваат со работното време во 23 часот.

Освен тоа, во Собранието следната недела се очекува да се усвојат измените на Законот за заштита на населението од заразни болести, па тогаш ќе биде задолжително носењето на маска надвор постојано, ќе се забрани групирање после 22 часот и ќе има забрана за домашни посети. Очекуваме овие два пакети сериозно да го забават ширењето на вирусот, рече министерот за здравство Венко Филипче.

Поради тоа што Инфективната клиника е речиси полна со пациенти заразени со коронавирус, целосно спремна е монтажната болница во непосредна близина, а за неа има и подготвен медицински кадар од останатите клиники што ќе работи со новиот наплив на пациенти.

Комисијата за заразни болести направила анализа на случаите и констатирала дека голем дел од граѓаните не можат да посочат каде се заразиле и затоа се третираат места каде што има групирање и главната цел е тоа да се спречи.

Засега полицискиот час е само последна мерка за која не се размислува, зашто се очекува останатите да дадат резултат.

Доктор Жарко Караџовски: Сами ако не си помогнеме болниците ќе се исполнат брзо и ќе има до 1000 заразени дневно!