Фудбалската репрезентација на Македонија денеска (18 часот) на Националната Арена „Тодор Проески“ ќе ја има последната проверка пред историскиот настап на Европското првенство. Противник на избраниците на селекторот Игор Ангеловски е селекцијата на Казахстан.
Фудбалерите пред настапот на ЕП ќе одиграат само два натпревари, на првиот дуел со Словенија победа им избега на „црвено-жолтите“ во 97. минута и денеска ги очекува дуел со Казахстан.
– Ова е добар подготвителен тренинг-меч, но не е од оној тип на мечеви како со Лихтенштајн или Гибралтар, зашто тие во мундијалските квалификации играа 1:1 со Украина. Се работи за репрезентација која во составот има многу млади фудбалери, претежно се од нивната лига, но сите ја знаеме Астана, која игра Европа и е добра екипа. Ние можеби ќе излеземе во поразличен тим, но нема да биде испретумбан. Тие што ќе треба да добијат поштеда ќе добијат, тие што треба да играат ќе играат – вели Ангеловски.

Од друга страна, фудбалерите сакаат со добра игра пред навивачите да се прикажат во одлично  светло и победнички да ги заминат на ЕП.

– Посебно е чувството да се игра пред навивачи и многу сме среќни што се вратија навивачите на трибините. Навивачите секогаш нѐ поддржувале и се надевам утре ќе биде исто така, дека ќе дојдат во максималниот дозволен број и ќе ни дадат нова поддршка. Очекувам добар меч, одиме на победа, ние и секогаш одиме на победа и дека повторно ќе ги израдуваме навивачите. Нѐ чека добра селекција која играше 1:1 во квалификациите со Украина – вели Елиф Елмас.

Според претходно утврдениот план, репрезентацијата на Македонија на 8 јуни заминува за Букурешт каде ќе ги одигра првите две кола во групата Ц. Историскиот деби настап на Македонија на ЕП ќе биде на 13 јуни против Австрија, а четири дена подоцна избраниците на Ангеловски ќе играат против Украина. Во последното трето коло, Македонија на 21 јуни во Амстердам ќе игра против Холандија.

Барди и понатаму е позитивен на коронавирус

ВИДЕО: Мајсторијата на Елмас недоволна за победа, Словенците се спасија во последната минута