Полицијата во канадскиот град Хамилтон, во провинцијата Онтарио, соопшти дека е уапсен човек кој украл градски автобус во кој имало десетина патници, јавуваат медиумите од Канада. Осомничениот влегол во автобусот кога возачот излегол на пауза, го запалил и тргнал.

Но, тој потоа само ја возел редовната вечерна линија на автобусот, застанувал на постојките и пуштал луѓе да влегуваат и излегуваат, а наплаќал и билети, велат од полицијата.

Патниците некое време воопшто не забележале дека автобусот е украден и дека го вози крадецот – тоа се случило дури кога по грешка скршнал од линијата, по што дел од патниците му давале и насоки каде да вози.

Во меѓувреме, била известена полицијата, која го следела автобусот и го запрела. Возачот одбил да излезе и полицајците морале да употребат сила. Возачот подоцна им рекол дека автобусот го украл затоа што „имал мерак“ да го вози.

И покрај отпорот при апсењето, полицијата во Хамилтон во официјална изјава го пофали возачот за тоа како го извел градското возење, наспроти тоа во што можела да се претвори целата ситуација.

„Тој одлично заврши работа“, изјави полицискиот портпарол.