Како се запознале принцезата Дајана и Мајкл Џексон: Не сакал да ја пее „Dirty Diana“ од почит кон Лејди Ди
На албумот „Bad“ на Мајкл Џексон се нашла и нумерата „Dirty Diana“ од 1988 година, за која Џексон го ангажирал гитаристот на Били Ајдол, познатиот Стив Стивенс.
Многумина мислеле дека песната ѝ е посветена на пејачката Дајана Рос, некои дека ѝ е посветена на принцезата Дајана, ама тоа не било точно.
Како што пишуваат странските медиуми, принцезата Дајана била голема обожавателка на Мајкл Џексон. Таа и принцот Чарлс присуствувале на концертот на Џексон во Лондон во 1988 година, на стадионот „Вембли“.
Кралскиот пар пред почетокот на настапот изразил желба да го запознае Мајкл Џексон, а нивната средба се случила зад сцената.
Џексон одлучил песната „Dirty Diana“ да ја извади од репертоарот од почит кон принцезата Дајана.
Меѓутоа, го дочекало изненадување.
Кога се сретнале, Дајана го прашала дали ќе ја изведе песната.
„Не, не. Ја исфрлив песната од почит кон Вас, ѝ рекол Џексон на Лејди Ди.
„Тоа ми е омилена песна“, му одговорила принцезата.
Сепак, Џексон не можел да ја врати песната во репертоарот, бидејќи било предоцна.