Поротата во Калифорнија во петокот им додели 40 милиони долари на жените кои тврдеа дека бебешката пудра на „Џонсон и Џонсон“ е виновна за нивниот рак на јајниците. Поротата на Вишиот суд во Лос Анџелес им додели 18 милиони долари на Моника Кент и 22 милиони долари на Дебора Шулц и нејзиниот сопруг откако откри дека „Џонсон и Џонсон“ со години знаеле дека нивните производи на база на талк се опасни, но не ги предупредиле потрошувачите.

Ерик Хас, потпретседател на „Џонсон и Џонсон“ за светски судски постапки, рече дека компанијата планира веднаш да се жали на пресудата и очекува да успее. Според судските записи, на Кент ѝ бил дијагностициран рак на јајници во 2014 година, а на Шулц во 2018 година. Двете жени се жителки на Калифорнија и велат дека користеле бебешка пудра по капење 40 години. Нивните третмани за рак на јајници вклучувале големи операции и десетици циклуси хемотерапија, сведочеа тие на судењето.

Енди Бирчфилд, адвокат на двете жени, ѝ рече на поротата дека „Џонсон и Џонсон“ знаеле уште во 1960-тите дека нивниот производ може да предизвика рак.

„Тие апсолутно знаеле, знаеле и направиле сè што можеле за да го сокријат тоа, да ја закопаат вистината за опасностите“, рече Бирчфилд.

Според судските поднесоци, „Џонсон и Џонсон“ се соочува со тужби од повеќе од 67.000 луѓе кои тврдат дека им бил дијагностициран рак откако ја користеле нејзината бебешка пудра и други производи со талк. Компанијата тврди дека нејзините производи се безбедни, без азбест и не предизвикуваат рак. Во 2020 година, „Џонсон и Џонсон“ престана да продава бебешка пудра на база на талк во САД, преминувајќи на производ од пченкарен скроб – пишува Кликс.ба.