За поголема шареноликост на вашата велигденска трпеза, можете да се обидете да обоите дел од јајцата со природни бои.

Често луѓето се сомневаат во квалитетот на купечките бои за јајца, а и природните намирници со сигурност не се токсични и дури и да навлезат преку лушпата, нема да го променат вкусот на јајцата.

Во бојадисувањето со природни бои е најважно јајцата да се остават што подолго, па макар и преку ноќ во подготвената боја. Најдобро е да ги оставите заедно со намирниците кои ја пуштаат бојата.

Сварете ги јајцата и во текот на варењето додадете малку оцет, за лушпата да може полесно да го прими пигментот. Не очекувајте да добиете интензивни бои, напротив, ќе добиете светли јајца кои изгледаат природно.

За сини нијанси користете црвена зелка.

Со лушпи од кромид ќе добиете темни жолти и портокалови нијанси.

Куркумата и карито даваат златна нијанса.

Со помош на камилица белите јајца ќе станат светло жолти, а со цвекло розови.

Боровинките користете ги за светло сина или виолетова нијанса, кафето за земјено кафеава и спанаќ и коприва за светло зелена.