Исто како што елегантна чанта или впечатливо парче накит може веднаш да го подигне целиот изглед, така и парфемот има моќ да го заокружи впечатокот. Но, колку и да е луксузен, совршено избалансиран или во склад со сезонските трендови, неговата магија може лесно да се наруши со погрешен начин на нанесување. За парфемот навистина да „живее“ на кожата, треба да му пристапите како на мал ритуал, а не само како на последен чекор пред да излезете од дома, пишува „Вечерњи лист“.

„Мирисот е личен ритуал. Треба да го носите како што ја носите модата – на начин што ви одговара“, вели парфимерот Орелиен Гишар, соосновач на брендот „Матиер премиер“, нагласувајќи дека мирисот треба да биде во склад со личноста, моментот и стилот.

Заборавете на „облакот“, парфемот ја сака кожата

Иако прскањето парфем во воздух и минувањето низ неговиот „облак“ изгледа романтично, експертите предупредуваат дека тоа не е најефикасниот начин.

„Парфемот мора да дојде во контакт со кожата за навистина да оживее“, објаснува парфимерот Жером Епинет.

Топлината на телото ги активира мирисните ноти и им овозможува постепено да се развиваат во текот на денот. Затоа парфемот нанесувајте го директно на пулсните точки – на вратот, на зглобовите и зад ушите. Две до три прскања се сосема доволни за суптилен, но долготраен мирисен траг.

Цврсти или течни парфеми, прашање на трајност и впечаток

Цврстите парфеми, збогатени со восоци и природни масла, подолго се задржуваат на кожата бидејќи испаруваат побавно. Од друга страна, парфемите и тоалетните води на база на алкохол имаат посилна дифузија и се шират поинтензивно.

„Алкохолот им помага на молекулите на мирисот подобро да се распрснат, додека цврстите парфеми остануваат поблиску до телото – поинтимни и подискретни“, вели естетичарката и хемичарка Естер Олу.

Со други зборови, ако сакате ефект на „мирисна аура“ што се чувствува при секое движење, изберете парфем во спреј. Ако пак сакате суптилен мирис што останува блиску до вас, како мала тајна – цврстиот парфем е вистинскиот избор.

Триење на зглобовите? Само нежно

Митот дека триењето на зглобовите ги „уништува“ мирисните молекули не е сосема точен. Сепак, експертите се согласуваат дека топлината создадена од триењето може да го забрза испарувањето на горните ноти.

Наместо да ги триете зглобовите, подобро е нежно да ги допрете еден до друг и да му дозволите на мирисот природно да се развие. Вистинската магија на парфемот лежи токму во неговата трансформација со текот на времето – од свеж почеток до длабока, топла база.

Хидратацијата е тајната на долготрајниот мирис

Една од најчестите грешки е нанесувањето парфем на сува кожа. Хидрираната кожа подобро го „задржува“ мирисот, па најдобро е парфемот да се нанесе веднаш по туширање, додека кожата е уште малку влажна, или по нанесување крем без мирис.

„На сува кожа парфемот испарува многу побрзо“, објаснува Жером Епинет.

За уште подобар ефект, можете претходно да нанесете прајмер за шминка или лосион со хијалуронска киселина на пулсните точки – тоа ќе помогне мирисот да трае подолго.

Парфем во косата – тајниот трик за „хало“ ефект

Мирисот во косата создава посебен, етеричен впечаток. Парфемите за коса се формулирани така што не ја сушат косата, а додаваат нежна „мирисна магла“ што се чувствува при секое движење.

„На нив гледам како на мек, флуиден слој што му дава движење и волумен на мирисот“, вели Орелиен Гишар.

Парфем на облеката – да, но внимателно

Парфемот на ткаенина може да трае подолго отколку на кожата, но потребна е претпазливост, бидејќи некои формули можат да остават дамки.

„Најбезбедно е мирисот лесно да се распрсне од мала оддалеченост или да се избере формула на база на вода“, советува Жером Епинет.

Кога мирисот се задржува и на кожата и на облеката, се создава дополнителна димензија – суптилна, но долготрајна, која ве обвива во текот на целиот ден.

ВИДЕОИНТЕРВЈУ | Мицов: „Не се прави добар парфем преку ноќ“