Туристичко-угостителската комора деновиве ќе соопшти свои предлози и барања, велат од Комората откако беше најавен ригорозен нов закон за заштита од пушењето, кој бездруго ќе го засегне угостителството.

„Во однос на новите предлог мерки за пушење ние како ТУК заедно со нашите членки деновиве градиме став во врска со новите предлог решенија. Во најкраток можен рок ќе излеземе со свои предлози, размислувања и барања“, велат од Туристичко-угостителската комора.

Оттаму не кажаа децидно ниту дали ќе иницираат средба со надлежните, наведувајќи дека тоа ќе го сторат „доколку има потреба“.

Според предлог-законот, кој наскоро ќе оди на јавна дебата, пушењето ќе биде дозволено на летните тераси од угостителските објекти, но само ако тие се отворени од три страни. Предвидени се и драконски казни за прекршителите, кои ќе мора да платат до 5.000 евра, а локалот може и да им биде затворен од пазарните инспектори.

Со овој закон Македонија влегува во групата земји со најригорозни закони за заштита од пушење. Слични решенија има и во земјите од ЕУ – Хрватска, Словенија, соседна Грција, додека во моментов во тек е носење на слично строг закон и во Србија и во Босна и Херцеговина.