Фатјон Јусуфи изрази големо задоволство по минималната победа на Арсими во Скопје против Македонија Ѓорче Петров, каде што беше и стрелец на единствениот гол на натпреварот, но потенцираше дека фокусот на екипата сега целосно е насочен кон новиот предизвик за гостиварци, а тоа е денешниот дуел со Пелистер.

– Победата во Скопје беше многу важна за нас, и поради освоените бодови, и поради самодовербата што ни ја дава како тим. Среќен сум што помогнав со гол, но пред сè сакам да го истакнам ангажманот и дисциплината на целата екипа – изјави Јусуфи.

Говорејќи за денешниот натпревар против Пелистер, играчот од средниот ред нагласи дека Арсими влегува максимално мотивиран да ја продолжи позитивната серија.

– Нѐ очекува тежок натпревар, но играме на домашен терен и пред нашите навивачи. Тоа е дополнителен мотив да го дадеме максимумот. Во текот на неделата добро се подготвувавме и атмосферата во тимот е многу позитивна – додаде играчот на Арсими.

Според Јусуфи, клучот за успехот ќе биде концентрацијата и колективната игра.

– Мораме да бидеме внимателни од првата до последната минута, да играме како тим и да ја искористиме поддршката од публиката. Нашата цел е јасна, да забележиме позитивен резултат и да го продолжиме нашиот пат со смиреност и самодоверба – вели Јусуфи.

Натпреварот од 27. коло во Првата македонска лига меѓу Арсими и Пелистер ќе се одигра денеска од 13.00 часот на градскиот стадион во Гостивар.