Јуначко срце на Капарос: Имам леукемија, но останувам да работам во Севиља
Хоакин Капарос по победата на Севиља над Валјадолид (2:0) во Ла Лига, на новинарите им откри дека е болен од леукемија, што е втор случај во клубот откако на Едуардо Беризо пред година и половина му беше дијагностициран рак на простата. Сепак, Капарос уште на стартот ги прекина сите шпекулации околу евентуалната иднина во клубот.
– Севиља ми е во крвта, а сега ми е кажано дека имам проблем со црвените и белите крвни зрнца во телото. Имам хронична леукемија, но нема да престанам да си ја работам својата работа секојдневно. Не добив третман и никој не треба да паничи – изјави Капарос.
Хоакин Капарос на клупата на Севиља седна минатиот месец, а претходно беше директор во шпанскиот прволигаш.
– Идејата е да продолжам со работата во овој фантастичен клуб. Нема да има никаква расправа околу тоа – порача Капарос.