Јотиќ: По секоја цена мора да го победиме Елверум!
Следниот натпревар во Лигата на шампионите Вардар 1961 ќе го има в недела со почеток од 16.00 часот во СЦ „Јане Сандански“ против Елверум од Норвешка.
Токму овој дуел е шанса за „црвено-црните“ да го избегнат барем дното во групата „А“ каде што се на осмото место со три бода, еден помалку од Елверум.
Своите очекувања во пресрет на овој дуел ги споделува ракометарот на македонската екипа, Ловро Јотиќ:
– Дефинитивно натпревар кој мора да го добиеме по секоја цена и на следниот меч со нив. Овие мечеви се клучни да освоиме бодови. Против Пик Сегед заслуживме барем бод, игравме два одлични натпревари, но паднавме во последните 10 минути и не успеавме да се вратиме, во Сегед проблемот беше на почетокот од вториот дел.
Мислам дека многу растеме како тим, дека тоа изгледа многу подобро отколку пред два месеци, играме навистина добро. Иако Пик Сегед беше фаворит, мислам дека доста ги намачивме. Очекувам добар натпревар против Елверум кој применува поразличен ракомет, Норвежаните трчаат многу повеќе, но со наша добра одбрана не би требало да ни прават проблеми како Сегед кој има многу поискусни играчи од норвешката екипа – вели Јотиќ.