Јончевски: Мора да ги запреме Мек Фејден и Шермандини
Кошаркарската репрезентација на Македонија утревечер ги продолжува настапите во квалификациите за пласман на СП 2023 година и во СЦ „Борис Трајковски“ (20 ч.) игра против Грузија.
Кошаркарите ќе имаат можност да го поправат впечатокот од последниот натпревар, кога во четвртокот во Тбилиси загубија токму од Грузија со убедливи 91:70.
– При анализата на натпреварот штo го одигравме во Тбилиси, забележавме многу работи што можеме да ги поправиме. Работевме на моментот да ги запреме нивните најдобри играчи Мекфејден и Шермадини, но не успеавме и ќе се обидеме тоа да го направиме во Скопје – вели асистентот на селектор Драган Бајиќ, Александар Јончевски кој ја водеше репрезентацијата во Тбилиси.
Поради неповолниот здравствен билтен, извесно е дека до пред почетокот на натпреварот нема да бидат познати дванаесетте кошаркари кои утревечер ќе се обидат да дојдат до првата победа во квалификациите.
– Имавме најави дека на утрешниот натпревар ќе се вратат неколку важни репрезентативци како Димитријевиќ, Мекиќ, Ѓуроски… но освен Димитријевиќ кој е присутен на тренинзите, сè уште не можеме да сметаме на останатите“ – појаснува Јончевски.
Последните тренинг-сесии ќе бидат искористени за уште подобра подготовка, но и за анализа.
– Денешните тренинзи ќе ги искористиме за подетална анализа и спроведување на тактичките замисли за тоа што нè очекува в недела. Мислам дека шансите не се загубени, бидејќи со подобра игра од онаа во четвртокот, како и со триумф против Украина во јуни, можеме да се надеваме на пласман во следната фаза од квалификациите- вели Јончевски.