Пет дена по пријавувањето дека на мобилната апликација „Телеграм“ постои група во која членови споделуваат експлицитни фотографии, видео материјали и лични податоци на малолетни и полнолетни девојки од Македонија, МВР уште ја нема сузбиено активноста.

Во меѓувреме, групата на „Телеграм“ е како пожар во кој постојано се додаваат нови фотографии, нови контакти и нови членови, а секој од нив е потенцијален извор на нови порнографски содржини кои од неговиот мобилен телефон доаѓаат до екраните на сите останати присутни.

„Јавна Соба“ уште не е отстранета од „Телеграм“. Но, името на групата сега е сменето во „Хм…“. Иако бројот на членовите е намален, сепак активностите не стивнуваат. Телефонски броеви од жени, девојчиња, фотографии, порнографски видео материјал и контакти за проституција, се единствените содржини што се споделуваат едно по друго меѓу 3.900 членови. Активноста е најголема навечер, додека во текот на денот е помала. Има повеќе администратори во групата на „Телеграм“, кои постојано одобруваат барања за нови членови кои може да ги додаде секој постоечки член.

Покрај разголените фотографии, со имиња, презимиња и населби од кои наводно потекнуваат девојките, се наведуваат и цени на услугите кои тие наводно ги нудат.

„Јавете ѝ се, од Валандово е. Цената е 3.500 денари“, пишува веднаш по разголените фотографии за девојка на која корисникот ѝ го наведува името и градот од кој потекнува.

Кога се јавивме на овој телефонски број, ни одговори подлабок женски глас.

– Не сум јас со тоа име. Разговарате со 75-годишна жена – ни рече соговорничката.

Група со малолетничка порнографија и секси фотки има и на платформата Дискорд. Дискорд е бесплатна платформа на која пораки и повици може да си упатуваат луѓе додека играат видео-игри. Групите на Дискорд се организирани како соби за четување на различни теми.