Стрип-манифестацијата Меѓународeн салон на стрип „Велес“ во своето 22-ро издание ќе биде отворена на 20 август, со почеток во 20 часот, во „Европска куќа – Велес“.

На отворањето на манифестацијата ќе се доделат награди, дипломи и признанија за годинашниот меѓународен стрип-конкурс и ќе биде отворена изложбата со избрани дела по истиот конкурс. Исто така, ќе се претстават и стрипови по повод 15 години од издавањето на балканскиот стрип-серијал „Вековници“, а промотор ќе биде Марко Стојановиќ од Лесковац, Србија.

Како што претходно информираа од Стрип-центарот на Македонија, годинава, на традиционалниот стрип-конкурс се пријавија рекордни 396 автор од целиот свет, од кои 164 се од нашата земја.

Жирито веќе ја заврши својата работа, а неизвесноста ќе расте до отворањето на изложбата во „Европска куќа – Велес“, кога ќе се прогласат најдобрите автори и стрипови.

Како што извести Томе Трајков, еден од координаторите на овој проект, активностите ќе продолжат и следниот ден, кога ќе почне вториот сегмент на салонот, а тоа е седмата стрип-колонија. Од 21 до 24 август во излетничкото место Нежилово стрип-автори од различни генерации од Бугарија, Србија и Македонија заеднички ќе творат свои стрипови.

Поддржувачи на настанот се Министерството за култура и туризам на Македонија, Општина Велес, „Европска куќа – Велес“ и многубројната стрип-заедницата во државата.