Италијанскиот виролог Крисанти: Лицата кои прележале ковид-19 се имуни најмалку девет месеци
Сè уште не знаеме колку долго трае имунитетот по вакцинирање против ковид-19, но знаеме со сигурност дека оние кои ја прележале болеста се заштитени меѓу девет и 10 месеци, изјави денеска познатиот италијански виролог, Андреа Крисанти.
До таквите податоци, според него, се дошло во истражување што се спроведува меѓу жители на општина во регионот Венето во кој на 21 март лани беше регистроран првиот случај на вирусот во Италија.
Професор Крисанти вели оти е утврдено дека лицата кои го прележале коронавирусот во првиот бран на пандемијата, а потоа биле во контакт со позитивни случаи во вториот бран, не само што не се инфицирале, туку кај нив е утврдено развој на уште повеќе антитела.
– Значи имунитетот на оние кои ја прележале инфекцијата трае најмалку девет месеци, а многу веројатно и подолго, заклучи Крисанти, пренесува агенцијата Танјуг.