Основното јавно обвинителство Гостивар спроведе истражна постапка против 30-годишен гостиварец, осомничен за неовластено изработување, држење и тргување со оружје или експлозивни материи.

-Осомничениот, на 6 ноември управувал автомобил „мерцедес – А класа“ по магистралниот пат А2, во правец Маврово-Гостивар. Кај асфалтната база – каменолом „Јефута“ полициски службеници му дале знак да застане заради контрола и преглед на возилото. Но, тој не ја почитувал дадената наредба и со голема брзина се упатил кон Гостивар. Полицајците се впуштиле во потера и го следеле со службени возила и во близина на Здуњски мост забележале дека преку прозорот на автомобилот фрлил автоматска пушка. Осомничениот подоцна бил запрен и приведен, а била пронајдена и автоматската пушка со вграден бајонет, чие поседување за граѓаните е целосно забрането, како и рамка со два куршуми со калибар 7,62 милиметри – соопштија од ОЈО Гостивар.

Бидејќи постои опасност осомничениот да се даде во бегство или да влијае врз сведоците, јавниот обвинител до судијата на претходна постапка од Основниот суд во Гостивар достави предлог за притвор.