Властите во Техеран му се заканија на Израел со одмазда поради нападот врз база на иранската Исламска револуционерна гарда во Дамаск.

Иран тврди дека Израел ги истрелал проектилите што ја уништија зградата во која била базата на Револуционерната гарда во главниот град на Сирија. При нападот загинале петмина офицери на елитната иранска единица, како и непрецизиран број сириски воени лица. Спасувачки екипи спроведуваат акција за извлекување на преживеани лица од урнатините.

Извори во сириската влада изјавиле за Ројтерс дека во зградата уништена од прецизни проектили се наоѓала канцеларија на иранската Исламска револуционерна гарда со советници на владата на претседателот Башар ал Асад. Изворите истакнале дека загинале пет ирански државјани, без да прецизираат дали имале чинови, како и „повеќемина“ сириски офицери. Меѓу загинатите бил и водачот на консултантското одделение на елитната иранска формација.

Израел, вообичаено, не ги коментира информациите за нападите надвор од својата територија. Во декември при сличен напад беа убиени двајца припадници на Револуционерната гарда близу Дамаск.

– Нападот е очајнички обид да се прошири нестабилноста во регионот. Иран го задржува правото во соодветно време и место да возврати на организираниот тероризам на лажниот ционистички режим – изјави Насер Канани, претставник на иранското Министерство за надворешни работи.

Сирија објави дека противвоздушната одбрана соборила неколку израелски проектили, но сепак била погодена зградата во квартот Мазех во Дамаск.