Кривична пријава е поднесена против 35-годишен жител на селото Стримница, во Општина Желино, поради заканувачко однесување кон вработени во општинската администрација.

Од СВР Тетово информираат дека инцидентот се случил на 2 јануари, кога лицето се појавило во зградата на Општина Желино со намера да оствари средба со градоначалникот. Откако било информирано дека градоначалникот во тој момент не се наоѓал во објектот, тој почнал да упатува закани кон двајца вработени.

Инцидентот бил пријавен во полиција, по што биле преземени соодветни мерки. По целосно документирање на настанот, против осомничениот е поднесена кривична пријава за кривично дело загрозување на сигурноста.