Бојана Скендеровски сподели многу емотивна приказна за неа и за децата од Домот за деца без родители „11 Октомври“, каде што ја доби титулата амбасадор на хуманоста.

„Кога бев мала, мислев дека суперхероите треба да знаат да летаат, да имаат натчовечки моќи, да го спасат светот од злото со еден поглед и да срушат некоја планина со удар на раката. Денес знам дека суперхероите изгледаат човечки, имаат големо срце, топли очи како вистински мајки, сакаат со цело срце и им даваат шанса на оние мали сонциња со кои судбината си поиграла…

Денес бевме заедно со дечињата од „11 Октомври“ и нивниот прекрасен персонал во посета на згрижувачко семејство, каде што ја запознав Даниела — современ суперхерој. Таа има свои три биолошки деца и ја згрижи Мила, која ја сака како свое дете, а Мила не се дели од неа… Дарија ја сака Мила како сестра, заедно учат, пеат, играат… Ајде да создадеме повеќе среќни приказни, станете згрижувач, бидете нечиј суперхерој“, напиша Бојана на Фејсбук.

Поп-пејачката вели дека е среќна што започнува ново поглавје во животот, насочено кон поддршка, грижа и поголема видливост на децата без родителска грижа.