Хрватска калуѓерка, идентификувана само како Марија, денеска е обвинета за лажно пријавување кривично дело, откако на крајот од минатата година тврдела дека мигрант ја нападнал со нож на улица во Загреб додека извикувал „Алаху екбер“, објави Индекс.хр.

Општинскиот кривичен државен обвинител во Загреб ја обвини 35-годишната калуѓерка дека го измислила целиот напад и дека самата си ги нанела повредите, со нож што го купила претходниот ден за четири евра. Обвинението против жената пристигна во Општинскиот суд во Загреб, потврди „Индекс“ вечерва.

Според обвинението, калуѓерката се повредила во својот дом во Загреб, а не во Малешеница, како што првично објави. Обвинителството го темели својот случај на низа материјални докази, спроведени испрашувања, но и на деталното признание на обвинетата.

Поради лажното пријавување, обвинителството му предложи на судот да издаде кривична наредба со која ќе ја осуди на десет месеци затвор, условно на три години, со плаќање на судска такса од 1.000 евра.

Случајот е покренат на 28 ноември 2025 година, кога доктор од Сестрите на милосрдието на KBC ја известил полицијата во 14:43 часот дека примиле жена со убодни рани во стомакот. Пациентката тврдела дека била нападната од непознат маж на улицата Долин околу 13:30 часот. Таа го дала и неговиот опис, но полицијата не пронашла никакви траги од крв на местото на наводниот напад. Прегледот на камерите за надзор утврдил дека калуѓерката дури и не поминувала по таа улица во наведеното време.

Детективите потоа отишле на нејзината домашна адреса. Пронашле траги од крв во ходникот, кои таа се обидела да ги избрише со чевлите. Вистинските траги биле во контејнерот пред куќата, каде што во црна кеса бил пронајден кујнски нож со траги од крв и влакна. Во кесата имало и крвава згужвана тоалетна хартија, која била употребена за лепење топче кафеава коса, црни чорапи, искината пластична фолија, употребен брич за еднократна употреба, како и бела маица со траги од крв во ткаенината видливи на предната и задната страна и на ракавите, пишува „Јутарњи“.

По понатамошната истрага, прегледот на снимките од 27 ноември, денот пред наводниот напад, откри дека калуѓерката била снимена во продавница  купувајќи токму таков нож.

По отпуштањето од болница на 1 декември, калуѓерката била однесена во седиштето на кривичната полиција. Таму, таа продолжила со својата приказна и потпишала кривична пријава против непознат сторител. Го опишала како маж на околу 35 години, со брада и мустаќи. Таа тврдела дека тој ѝ се приближил одзади и два до три пати го замавнал ножот кон нејзиниот стомак.

„Цело време додека траеше тој напад и замавнувањето со ножот кон мојот стомак, тој викаше „Алаху акбар““, ѝ рекла таа на полицијата.

Сепак, откако ѝ биле презентирани сите собрани докази, таа признала дека измислила се. Поради нејзината состојба, повикана е брза помош и таа била пренесена во Психијатриската болница Врапче. Психијатрискиот преглед не утврдил постоење на сериозни ментални нарушувања, а стручното мислење заклучило дека нејзината способност за разбирање на процедурите е намалена, но не значително, и дека нема потреба да се изрекуваат безбедносни мерки за лекување.