Голем хотелски синџир со седиште во Германија, кој управува со стотици објекти низ Европа, а иднината на повеќе од 120 локации во моментов е неизвесна. „Рево Хоспиталити“, порано позната како HR Group, е најголемиот европски хотелски оператор од трета страна (оператор со бела етикета) кој управува со хотели под свои и глобални брендови, од средни до луксузни брендови под франшиза, како што се „Хилтон“, „Хајат“, „ИХГ“, „Акор“, „Мериот“ и други.

Групацијата треба да се реструктуира до летото, но не е сигурно каков ќе биде нејзиниот состав- пишува Јутарњи лист.

Групацијата „Рево“ управува со повеќе од 260 хотели и околу 39.000 соби во 12 европски земји. Најмногу хотели има во Германија и Австрија, вкупно 125 хотели за кои тврдат дека ќе останат отворени и ќе продолжат да вработуваат приближно 5.500 работници. Сè уште не е јасно што точно ќе се случи со другите хотели лоцирани во Италија, Холандија, Шпанија, Франција, Чешка, Словачка, Швајцарија и во други држави. Со поднесување барање за несолвентност, „Рево Хоспиталити“ ќе биде реструктуирана во рамките на самоуправувањето до летото оваа година, според групацијата, која вклучува дури 140 компании.

Поднесувањето барање за несолвентност не значи автоматски банкрот. Во случајот со „Рево Хоспиталити“, станува збор за несолвентност со самоуправување, законска постапка во која компанијата признава дека во моментов не е во можност правилно да ги исполни сите финансиски обврски, но продолжува да работи под судски надзор. Менаџментот останува на чело на компанијата, хотелите остануваат отворени, а целта на постапката не е ликвидација, туку финансиско реструктуирање.

Таквиот модел овозможува привремена заштита од доверители, осигурување на исплатите на плати на вработените и повторно преговарање за договори за закуп, кредити и други обврски.

„Со постапките за несолвентност за приближно 140 компании, кои претежно се започнати во рамките на самоуправување, постојат добри изгледи за брзо реструктуирање и долгорочен континуитет на работењето. Веднаш ќе го стабилизираме бизнисот и ќе спроведеме почетни мерки за реструктуирање во договор со клучните засегнати страни. Поднесовме барање до Федералната агенција за вработување за претходно финансирање на исплатите на плати за периодот од јануари до март 2026 година“, рече Гордон Гајзер од GT Restructuring, кој беше назначен за директор за време на постапката за самоуправување.

Во соопштението на компанијата се наведува дека економската криза во Германија најмногу придонесе за проблемите во кои се најдоа компаниите во групацијата, особено зголемените трошоци за работна сила и наглото зголемување на минималната плата, но и повисоките трошоци за кирија, енергија и храна. Иако, тие признаваат дека ситуацијата ескалираше со силната експанзија на Revo Hospitality Group во последните години, што доведе до дуплирани структури и проблеми со интеграцијата. Во исто време, многу хотели работеа според долгорочен закуп и договори за франшиза, што значително ги зголеми фиксните трошоци на нестабилниот пазар.

Revo Hospitality започна со работа во 2008 година со само еден хотел во Лајпциг, до 2013 година имаа 10 хотели, 51 хотел до 2020 година, а посилна експанзија започна во 2016 година, со отворање на ново седиште во Берлин. Најголемиот пробив се случи во 2022 година, кога бројот на хотели скокна на 145 преку серија големи аквизиции. Експанзијата продолжува во 2023 и 2024 година, кога групацијата надмина 190 хотели и ги прошири операциите низ цела Европа, со повеќе од 7.000 вработени.

Лани, веќе под името Revo Hospitality Group, компанијата достигна стратешка пресвртница со преземање на управувањето со повеќе од 60 објекти на H-Hotels, што го зголеми вкупното портфолио на 260 хотели и го потврди статусот на една од најбрзо растечките хотелски групи во Европа.

Групацијата лани имаше приходи од 1,3 милијарди евра, со околу 8.300 вработени, но растот на трошоците поврзани со проширувањето не го следеше растот на прометот што го очекуваа, па затоа не го остварија ниту деловниот план во 2025 година.