Хит филмот „Свадба“ го залуде регионот: Еве колку милиони евра заработи на киноблагајните
Хит филмот „Свадба“ ги урива „регионалните рекорди“. Најновите бројки го кажуваат следново: Вкупниот број на гледачи во Хрватска е 440.326, а во Босна и Херцеговина 166.035, што значи дека филмот го гледале вкупно 606.361 луѓе, пишува „24сата.хр“.
Препорачано
Во Хрватска филмот заработил 3.117.735 евра, а во БиХ 722.724 евра, што доведува до вкупен приход од 3.840.459 евра.
Oдличната комедија на Шереги некои ја гледале и повеќепати во кино, а по Загреб и Белград е на турнеја низ регионот, односно во Скопје, Љубљана, Марибор…
Комедијата „Свадба“ на 5 февруари ја имаше својата македонска премиера. Екипата на филмот на социјалните мрежи објави дека во Скопје се распродадени 17 сали во првиот ден.
Комедијата, која е снимена во копродукција помеѓу Хрватска и Србија, во режија на Игор Шереги е хит во регионот.
Филмот ја следи приказната за две семејства, едното хрватско, другото српско, чиј однос постојано „танцува“ помеѓу топла семејна приказна и меѓународен инцидент. Во него игра мешано хрватско-српска екипа. Во главната улога настапува познатиот српски актер Драган Бјелогрлиќ, кој го толкува ликот на Вук Димитријевиќ, како и реномираниот хрватскиот актер Рене Биторајац, кој, пак, го игра ликот на Миљенко Лончариќ. Во другите улоги настапуваат: Весна Тривалиќ, Марко Грабеж, Линда Бегоња, Анѓелка Стевиќ-Жугиќ, Роко Сикавица, Ника Грбеља, како и Јелисавета Сека Саблиќ.
Сценаристи на филмот кој во најголемиот дел е сниман на Јадран се Игор Шереги, Марко Бацковиќ и Марко Јоциќ, а продуценти се Иван Келава и Марко Јоциќ.
„Познат хрватски претприемач на својот роденден дознава дека е пред банкрот. Во неговата канцеларија влегува семејство со торта и дајрења, а во исто време неговата ќерка, која студира во Лондон, и со честитка му соопштува дека е бремена“, е краток опис на дејствието на филмот што го освои регионот.
– Во филмот „Свадба“, сакавме преку сатира да ја прикажеме сегашната политичка и економска елита, но и љубовта и толеранцијата што доаѓаат преку помладите генерации. Среќен сум што успеав да соберам врвна екипа актери – рекол Шереги претходно.
