Свечената премиера на филмската комедија „Свадба“ (Svadba) се одржа вчеравечер во Белград, каде што во култниот Сава центар се собра актерската екипа и бројни гости од јавниот живот.

На настанот присуствуваа актерот Рене Биторајац и актерката Линда Бегоња, додека Анѓелка Стевиќ Жугиќ се појави во придружба на својот сопруг Марко Жугиќ.

Режисерот на филмот, Игор Шереги, исто така пристигна со сопругата. Меѓу присутните беше и актерот и режисер Драган Бјелогрлиќ, како и други познати личности кои дојдоа да им дадат поддршка на своите колеги.

Филмот веќе бележи исклучителен интерес кај публиката, со рекордно отворање уште во првиот викенд од прикажувањето, неколку дена по успешната претпродажба и големата загрепска премиера.

Дејството ја следи приказната за успешен хрватски претприемач кој на својот роденден дознава дека е пред банкрот. Во исто време открива дека неговата ќерка, која студира во Лондон, е бремена и го очекува детето на српски министер, што отвора низа политички, општествени и семејни заплети, преку кои филмот, со хумор и емоција, проговорува за семејството, идентитетот, љубовта и лојалноста.