Хамас попладнево објави дека, во соработка со Исламски џихад, на Израел ќе му предаде телото на заложник во 16 часот. Екипите на Меѓународниот Црвен Крст веќе се упатија кон Газа, објави Тајмс оф Израел.

Според Исламски џихад, телото е пронајдено вчера во областа Нусејрат, во централниот дел на Појасот Газа.

Ова ќе биде предавање на 26-то од 28-те тела на заложници што останаа во Газа.

„Бригадите Ал-Кудс и Бригадите Ал-Касам ќе го предадат телото на еден од израелските затвореници, кој беше пронајден во централниот Појас Газа“, се вели во заедничко соопштение на двете организации.

Малку порано, Израел ја обвини организацијата Исламски џихад за кршење на кревкото примирје во Газа со одложување на предавањето на телото што оваа вооружена палестинска организација објави дека го пронашла вчера, понеделник.

Телата на уште тројца убиени заложници сè уште се чуваат во Газа: Дрор Ор, наредник Ран Гвили и тајландски државјанин Судтисак Ринталак.