Меѓународниот суд на правдата во Хаг повторно го отфрли барањето на Ратко Младиќ, поранешниот командант на армијата на босанските Срби осуден на доживотен затвор за геноцид и други воени злосторства, за привремено ослободување. Младиќ побара да му се одобри седумдневно отсуство за да го посети гробот на близок роднина и да присуствува на комеморација, но судот беше непопустлив, пишува Индекс.хр.

Одлуката со која се одбива барањето на Младиќ за привремено ослободување од притворната единица на ОН во Хаг ја потпиша претседателката на Меѓународниот механизам за кривични судови, Грациела Гати Сантана.

Таа изјави дека е потребен „висок праг“ за одобрување на привремено ослободување од сочувствителни причини за присуство на комеморација на член на семејството и дека такво ослободување „во минатото не им било одобрено на лица притворени во притворната единица на ОН по нивната конечна пресуда“.

Гати Сантана додаде дека при донесувањето на одлуката го зела предвид фактот дека Младиќ бил осуден на доживотен затвор за многу сериозни кривични дела, дека отслужил само мал дел од казната и дека, пред неговото апсење и екстрадиција во Меѓународниот кривичен трибунал за поранешна Југославија во мај 2011 година, тој избегнувал правда речиси 16 години.

Таа, исто така, истакна дека на Младиќ неколкупати му било одбиено ослободувањето за време на судењето и жалбената постапка поради загриженост дека нема да се врати во притвор и дека не ја докажал оправданоста за бараното ослободување.

Ратко Младиќ, воен командант на Војската на Република Српска, беше осуден на доживотен затвор во 2017 година пред Хашкиот суд. Пресудата стана правосилна по второстепената одлука од 2021 година.

Младиќ беше прогласен за виновен за геноцид (по две точки), злосторства против човештвото (по пет точки) и воени злосторства (по четири точки) што ги извршил како највисок воен командант на Војската на Република Српска, со цел создавање на таканаречената Република Српска.