Грчкиот парламент усвои закон со кој им се дозволува на работодавците од приватниот сектор да го продолжат работното време, и покрај протестите на работниците што веќе се борат да се справат со високите трошоци за живот, пренесува Би-би-си.

Законот, кој им овозможува на работодавците да воведат 13-часовен работен ден, поголем од сегашните максимални осум, има за цел „да го направи пазарот на трудот пофлексибилен и поефикасен“, соопшти конзервативната влада во Атина.

Но, предлогот предизвика два генерални штрајкови овој месец, бидејќи работниците велат дека тоа ќе ги поткопа нивните права додека се борат да се справат со стагнација на платите и зголемување на трошоците за храна и кирија.

„Додека остатокот од Европа дискутира за намалување на работното време, во Грција го зголемуваат“, рече Темис Литрас, 41-годишен шанкер кој рече дека неговата кирија двојно се зголемила во последните две години.

Најдолгата работна недела во Европа

Грција е меѓу земјите со најдолга работна недела во Европа, околу 40 часа, според податоците на ЕУ, во споредба со просекот од 34 часа во Германија или 32 во Холандија. Во исто време, куповната моќ во Грција е меѓу најслабите во ЕУ, според Евростат.

Новиот закон дозволува подолго работно време само три дена во месецот и до 37 дена во годината.

Законот ги штити луѓето од отпуштање ако одбијат да работат прекувремено, но синдикатите предупредуваат дека тоа им ја одзема моќта за преговарање на работниците во земја каде што непријавената работа е распространета, а просечните плати се релативно ниски.

Законот, исто така, им дава на работодавачите поголема флексибилност кога станува збор за краткорочно вработување и им дозволува на работниците да работат четири дена во неделата во текот на целата година доколку се согласат со својот работодавач.