Бугарскиот в.д. министер за одбрана Атанас Запрјанов соопшти дека системот за противвоздушна одбрана „Патриот“, обезбеден од Грција, веќе е ставен во функција и дека Бугарија во моментов има целосна воздушна заштита. Говорејќи пред новинарите во Народното собрание, тој рече дека системот почнал да работи околу 16 часа откако Грција потврдила дека ќе ѝ помогне на Бугарија преку механизмите на НАТО. Според министерот, распоредувањето е дел од пошироките напори за зајакнување на националните капацитети за воздушна одбрана во услови на растечки регионални тензии, објави „Новините“.

Запрјанов објасни дека Бугарија и Грција веќе имаат ратификуван договор што дозволува прекугранични операции меѓу нивните воздухопловни сили. Поради оваа рамка, авиони од двете земји можат да изведуваат заеднички патроли без правни или оперативни пречки. Тој истакна и дека Бугарија и Грција функционираат во рамки на единствениот НАТО систем за ракетна и воздушна одбрана, што значи дека радарските и надзорните информации што ги регистрираат бугарските сили истовремено им се достапни и на грчките.

Грција ќе распоредува офицери во бугарската воздушна одбрана

Нов елемент во соработката е постојаното распоредување на двајца офицери од грчките вооружени сили во бугарската структура за воздушна одбрана. Нивната задача ќе биде да ги координираат операциите меѓу двете армии и да обезбедат непречена комуникација и интеграција меѓу системите на двете земји членки на НАТО.

Министерот за одбрана нагласи дека системот „Патриот“, позициониран во северна Грција, обезбедува ракетна заштита над значителен дел од бугарската територија. Тој додаде дека и бугарските единици за воздушна одбрана активно учествуваат во операцијата и се целосно подготвени. Запрјанов истакна дека ниедна бугарска ракета не е префрлена во странство и дека сите одбранбени системи остануваат целосно опремени во земјата.

Дендијас: Грција ќе помогне во антибалистичката заштита на Бугарија од Иран

Авионите Ф-16 ја засилуваат безбедноста

Покрај системот „Патриот“, два грчки борбени авиони Ф-16 ја засилуваат безбедноста на бугарскиот воздушен простор како дел од соработката. Запрјанов потврди дека грчкиот министер за одбрана ќе ја посети Бугарија во четврток на покана на бугарската влада. За време на посетата, грчкиот министер првин ќе се сретне со вршителот на должност премиер Андреј Ѓуров, а потоа ќе разговара и со Запрјанов.

Бугарскиот министер за одбрана Атанас Запрјанов изјави дека засилените мерки за воздушна одбрана не треба да се толкуваат како одговор на непосредна воена закана, туку како превентивен чекор за подобрување на безбедносниот систем и подготовка за можни ризици. Според него, целта е во услови на мир да се зајакнат постојните капацитети преку нови способности и подобра организација, а не како реакција на конкретна опасност.

Америка сѐ уште не побарала да распореди авиони во Бугарија

Министерот беше прашан и дали САД би можеле да побараат распоредување на воена опрема или авиони во Бугарија, слично на случајот со Романија. Тој посочи дека такво барање досега не е упатено до Софија, но дека владата размислува за можноста американските авиони, кои моментално се наоѓаат на аеродромот „Васил Левски“ во Софија, да бидат преместени во воената база Безмер.

Идејата е да се намали метежот на цивилниот аеродром бидејќи се очекува зголемен воздушен сообраќај по 15 април. Според постојните договори, американските авиони можат да останат на аеродромот во Софија до 31 мај.

Дали Романија се вмешува во војната со Иран? Букурешт дозволи американски војници и авиони на својата територија

Софија ќе бара заем од 3,261 милијарди евра

Во меѓувреме, парламентарната Комисија за одбрана во прво читање ги поддржа измените на законот за привремено финансирање до усвојување на буџетот за 2026 година. Со овие измени се отвора можност бугарската влада да преговара за заем од 3,261 милијарди евра од Европската комисија преку инструментот САФЕ, наменет за зајакнување на европската одбранбена индустрија.

Доколку договорот се постигне, Бугарија би можела да добие авансно финансирање од 15 отсто веќе во април, а проектите финансирани преку оваа програма би биле ослободени од ДДВ.

Војската симулира напади

Истовремено, Бугарија ја подигна противвоздушната одбрана на повисоко ниво на готовност. Војската изведува вежби за симулација на напади со крстосувачки ракети, а поголемиот дел од позициите на противвоздушната одбрана се распоредени долж брегот на Црното Море, пишува „Новините“.

Системот се потпира главно на ракетите Ц-300, дополнети со постарите Ц-125 и Ц-75, додека новите германски системи ИРИС-Т се очекува да пристигнат подоцна оваа година.

Покрај сопствените капацитети, Бугарија добива поддршка и од противракетниот штит на НАТО, чијшто главен центар е во Романија.

Сепак, поранешниот министер и политичар Румен Петков побара поголема транспарентност околу распоредувањето на противвоздушните системи на црноморскиот брег.

Тој предупреди дека нејасните објаснувања од властите може да ја доведат јавноста во заблуда и дури да влијаат врз туристичката сезона, па повика парламентот да го разгледа прашањето.

Бугарија не се соочува со закана од Блискиот Исток, уверува претседателката Јотова