Падот на хеликоптерот во кој трагично го загубија животот легендарниот НБА играч, Коби Брајант, неговата ќерка Џиана и останатите седум лица, и понатаму е сериозна тема во Лос Анџелес поради судскиот спор.

Вдовицата на Коби, Ванеса Брајант поднесе неколку тужби против полицајците кои објавуваа фотографии од местото на несреќата, а една од тие тужби се однесува и на градот Лос Анџелес.

Сега, адвокатите на градот Лос Анџелес одлучија да го возвратат ударот и побараа психијатриско испитување за Ванеса Брајант.

Тие со овој потег сакаат да докажат дека Ванеса патела од депресија и емоционален стрес поради загубата на сопругот и ќерката, а не поради фотографиите од местото на несреќата кои ги делеа полицајците.

Исто така сметаат дека Ванеса не може да пати поради фотографии кои никогаш не ги видела, но и фотографии кои не се појавиле во јавноста туку се делеле меѓу пријатели и во локали. Поради тоа, адвокатите побараа од судот да и нареди на Ванеса Брајант да биде испитана од психијатар.

Адвокатите на Ванеса Брајант се разочарани од ваквиот потег на одбраната и наведуваат дека испитувањето за несреќата ќе ја натера вдовицата на Коби да се потсети на трагичната несреќа и дополнително ќе ја повредат.