Градоначалникот на Кисела Вода, Филип Темелковски, на својата фејсбук-страница објави дека денеска учествувал на онлајн-работилница во организација на американскиот Национален демократски институт (НДИ), на тема родова рамноправност.

„Родовата еднаквост и родово сензитивни политики се дел од секојдневието на општините. Се заблагодарувам на #НДИ #NDI за поканата и можноста да учествувам на работилницата и да ги споделам своите размислувања но и да се запознам за нови меѓународни практики за спроведување на родовата рамноправност во политиките и активностите на општината“, напиша Темелковски на Фејсбук.

Но, она што веднаш се забележува од фотографиите кои ги објави градоначалникот, е дека меѓу учесниците во оваа работилница нема ниту една жена, што е во најмала рака чудно, со оглед на темата.

„Мора да гарантираме спроведување на родово сензитивни политики и подеднаква грижа за имплементирање на родово сензитивни активности и проекти во општината. Секој проект и активност има различно влијание врз благосотојбата на мажите или жените. Грижата и поткрепата на родовата еднаквост е застапена во активностите на Кисела Вода“, додава градоначалникот во објавата.