Големата воена парада започна денеска во Солун по повод националната годишнина од 28 октомври 1940 година, пред претседателот на Република Грција Константинос Тасулас и премиерот Киријакос Мицотакис, каде што вооружените сили го претставуваат новиот арсенал на земјата, објави грчката телевизија Скај.

Парадата се одржува во чест на грчкото „не“ односно одбивањето да се предаде на фашистичка Италија во 1940 година и го слави националниот отпор и херојство во текот на Втората светска војна.

Импресивната парада се одржува на крајбрежната авенија „Александар Велики“ и на неа присуствуваат: министрите за одбрана на Грција, Никос Дендиас и на Кипар, Василис Палмас, претседателот на ПАСОК – Движење за промени, Никос Андроулакис, претседателот на СИРИЗА – Прогресивна алијанса, Сократ Фамелос, солунскиот митрополит Филотеј, претставници на партиите, членови на владата, пратеници, регионалниот гувернер на Централна Македонија, Атина Аидона, градоначалникот на Солун, Стелиос Ангелудис, избрани претставници на локалната самоуправа, раководството на вооружените сили и безбедносните сили, претставници на конзуларните власти итн.

Новиот воен арсенал на Грција

На парадата за прв пат пред пошироката јавност се прикажуваат нови системи на оружје како што се ракетите „Ремпејџ“ и комплетите „Спајс“, кои ги претвораат бомбите за општа намена во наведувано оружје.

На ниво на тенкови, на парадата ќе бидат презентирани тенковите „леопард“ на грчката армија опремени со специјални „кафези“ што ги штитат од можни удари во куполата на тенкот.

Исто така, изложен е и арсеналот на воздухопловните сили, ракетите „Метеор“ и „Скалп“, кои парадираат на возила.

Понатаму, јавноста ќе биде „запознаена“ со електронското оружје за војување „Хиперион“, кое има способност да соборува непријателски дронови и е наменето за површински единици на морнарицата, како и со роботски систем за неутрализирање на импровизирани експлозивни направи.

Покрај тоа, граѓаните ќе може одблизу да ги видат можностите на грчкиот систем против дронови „Кентаурус“, кој беше успешно тестиран на грчки фрегати кои учествуваа во операцијата „Штит“ во Црвеното Море, спречувајќи напади од беспилотни летала на Хутите.

Сите нови системи се во рамките на „Агендата 2030“, како и новите противтенковски ракети Спајк НЛОС, кои неодамна ги добија вооружените сили.

Во исто време, на парадата ќе бидат прикажани и беспилотни возила и за воздух и за море и серија мини дронови од Поморската академија.

Конечно, ќе парадираат беспилотни и автономни хеликоптери, како и беспилотни летала и дронови за вертикално полетување кои користат можности за вештачка интелигенција.