Голема победа на Гостивар во Битола за враќање во трката за пласман во плеј-офот
Кошаркарите на Гостивар остварија голема победа на гостувањето кај Пелистер со 71:72 и се вратија во игра за пласман во плеј-офот. Херој на Гостиварци беше Ефремовски кој на 13 секунди до крајот погоди тројка за 71:72. Пелистер имаше шанса да дојде до победата, но Малешевиќ не беше прецизен.
По водството кое го имаа „пелистерци“ во првата четвртина (21:17), гостинскиот тим во втората четвртина покажа дека е подготвен за изненадување, направи серија од неверојатни 4:23 и на одмор замина со убедливи 25:40. Во третата четвртина, лидерот на табелата се врати во игра и дојде до израмнување (52:52).
Последната четвртина помина во израмена игра и во која најголемата предност на една екипа изнесуваше пет поени (52:57). Во финишот, по реализацијата на двете слободни фрлања на Силаџи, на нецели две минути пред крајот, Гостивар поведе со 69:66. Пелистер возврати со тројката на Малешевиќ на 01:34 минута до крајот.
Во следниот напад, две слободни фрлања за Пелистер погоди Кесар и водство од 71:69. Гостивар одговори со тројката на Ефремовски на 13 секунди до крајот за 72:71 резултат кој се покажа како конечен бидејќи Малешевиќ не успеа да погоди за домашниот тим.
Силаџи беше најдобар кај гостиварци со 31 поен, Димитриевски даде 13, а Ренсом 10 поени. Кај Пелистер најефикасен беше Малешевиќ со 21 поен, Стајиќ даде постигна 18 поени.
Во плеј-аутот, најтрофејниот кошаркарски колектив во Македонија, Работнички загуби со 72:64 на гостувањето кај Ангели. Ангели до првата победа во плеј-аутот стигнаа благодарение на одличната игра во три четвртини кога дојде до плус 18 (61-43). Предводници во победата на Ангели беа Раме со 21 и Хендерсон со 13 поени.
Кожув во ефикасен меч со 102:96 беше подобар од вториот тим на МЗТ Скопје и ја прекина низата од три порази во плеј-аутот. Најзаслужни за победата беа Унрих со 25 поени и Колев и Деј ко дадоа по 21 поен.
Куманово со 88:84 беше подобар од Академија ФМП. Зивчевиќ беше најпрецизен кај Куманово со 27 поени, додека Јузбашиќ одигра одлично остварувајќи дабл-дабл од 24 поени и 22 скокови.