Семејството на муслиманот Мохамад Аклак, кој во 2015 година беше убиен од хиндуистичка толпа во индиската држава Утар Прадеш поради гласини дека консумирал говедско месо, повторно јавно зборува и порачува дека нивната борба за правда нема да запре.

Повод за нивната реакција е последниот потег на властите, кои побараа локалниот суд да ги повлече сите обвиненија против 18-те осомничени за неговото убиство, пренесува Би-би-си.

Аклaк, тогаш 50-годишен, беше претепан до смрт откако во селото Дадри, само 49 километри од Њу Делхи, се проширила гласина дека во својот дом чувал и јадел говедско месо.

Неговото семејство и денес категорично го негира тоа. Прашањето за колење крави е крајно чувствително во Индија, земја во која околу 80 проценти од населението се хиндуисти и ја сметаат кравата за свето животно. Утар Прадеш е меѓу 20-те индиски држави со строги закони што ја забрануваат продажбата, колењето и консумацијата на говедско месо.

Убиството предизвика огромни јавни реакции и протести низ целата држава, а случајот беше еден од првите кои привлекоа масовно медиумско внимание во контекст на насилства поврзани со крави.

Адвокатот на семејството потврди за Би-би-си Хинди дека 18 луѓе се обвинети за низа тешки дела, меѓу кои и убиство и предизвикување нереди, но сите се на слобода со гаранција. Сега, владата на Утар Прадеш, предводена од БЈП, поднела барање до судот да се укинат сите обвиненија, наведувајќи дека исказите на сведоците биле „недоследни“. Судот треба да одлучи на 12 декември.

Веста длабоко го потресе семејството.

„Не можевме ни да замислиме дека нашата борба долга една деценија ќе се обидат вака да ја затворат“, вели помладиот брат на Аклак, Џан Мохамад.

Семејството го напуштило селото веднаш по нападот и никогаш не се вратило.

Од владата тврдат дека членовите на семејството и другите сведоци давале различни бројки за напаѓачите: сопругата на Аклак навела 10 лица, ќерка му Шаиста 16, а синот Даниш 19. Правниот застапник на семејството, Мохамад Јусуф Сафи, објаснува дека тоа е разбирливо поради хаосот и шокот во моментот на нападот, и дека единствено важно е дали има докази за лицата што се именувани како напаѓачи.

Во нападот од 28 септември 2015 година, вооружена толпа со палки, мечеви и пиштоли упаднала во домот на семејството по објава од локален храм дека некој заклал и изел крава. Во фрижидерот било пронајдено месо за кое семејството тврди дека било овчо, но толпата тоа го искористила како „доказ“. Аклак починал на лице место, а неговиот 22-годишен син Даниш бил тешко повреден.

Во 2016 година против семејството Аклак била покрената и противтужба за наводно прекршување на законот за забрана на колење крави – постапка што сè уште стои во суд. Сафи истакнува дека првиот ветеринарен извештај покажал дека месото било козјо, а не говедско, и оценува дека противтужбата служела за притисок.

И покрај стравот и неизвесноста, семејството не се откажува. „Сè уште верувам во судот“, порачува братот на Аклак. „Убеден сум дека правдата еден ден ќе победи.“