Словенечката група „Џокер аут“, која за кратко време стана тинејџерска атракција, ќе настапи на годинашното издание на фестивалот „Скопје колинг“. Концертот ќе биде на отворено и ќе се одржи на Стадионот на АРМ на 29 јуни.

„Дваесет милиони преслушувања на Спотифај, соработка со Елвис Костело, распродаден концерт во легендарната сала Електрик Болрум во Лондон, распродадени концерти во Aнглија, Полска, Ирска, Норвешка, Шведска, Финска, вирален настап на Евровизија… повеќе од јасно е дека овие регионални, а светски шампиони ја заслужуваат водечката позиција покрај ‘Масив атак’ и Ник Кејв на годинашното издание на ‘Скопје колинг’“, велат од продукцијата „Авалон“, кои го организираат овој фестивал.

Влезниците ќе бидат во продажба од среда, 16 април, со почеток во 10 часот наутро онлајн на avalonbooking.mk и во продажната мрежа на karti.com.mk низ Македонија по следните цени и категории: партер – 1.000 денари и фан пит – 1.500 денари.