Инспектор вработен во Министерството за внатрешни работи (МВР) неколку години управувал полициски хеликоптер со фалсификувана дозвола. Во тој период, според информациите што ги објави „Фокус“, со хеликоптерот се превезувале и високи политичари и министри.

Одделот за внатрешна контрола, криминалистички истраги и професионални стандарди поднел кривична пријава против него поради сомнение за „фалсификување исправа“ според Кривичниот законик.

Според пријавата, во периодот од 27 февруари до 10 април 2023 година, главниот пилот на Одделот за воздухопловни единици, незаконски впишал во својата дозвола за член на екипаж овластување за инструктор на хеликоптер од типот TRI BELL 206, иако не ги исполнувал условите. Наводно, овластувањето било прикажано како стекнато на 26 февруари 2020 година.

Случајот е доставен до надлежното обвинителство, кое треба да одлучи за понатамошната постапка, пишува Фокус.