Не играше во претквалификациите за Светскиот куп, но сега му се стави на располагање на селекторот Марјан Илиевски на првиот тренинг пред она што е следно за најдобрата македонска кошаркарска репрезентација.

Почетокот на претквалификациите за Евробаскетот во 2029 година за нашиот сениорски тим ќе биде „побогат“ со присуството на искусниот Стојан Ѓуроски.

А 34-годишниот кошаркар изрази задоволство што повторно е дел од тимот:

– Чувството е одлично. Задоволство е и гордост да се претставува Македонија. Не настапив на последните мечеви заради повреда, и убаво е што пак сме заедно. Мислам дека ни следи одлична атмосфера, да ги анализираме противниците и да се спремиме за следните два меча. Уште ги немаме гледано ривалите, но ние одиме на победа без разлика кој е на другата страна. Имаме три дена подготовки, но за сите е исто. Имаме неколку повратници во екипата, сме играле и со Вајли заедно, така што нема да имаме проблеми да се воиграме – рече Ѓуроски.

Натпреварот против селекцијата на Азербејџан, Македонија ќе го игра на 27 ноември од 19.00 часот, во салата на СРЦ „Кале“ во Скопје.