Германски државјанин е уапсен на границата со Франција под сомнение дека сакал да купи огнено оружје за да се подготви за исламистички терористички напад, објавија денеска германските власти.

Обвинителството на германската провинција Баден-Виртемберг објави дека 21-годишник, чие име не е објавено, бил приведен во четвртокот кога се обидел да влезе од соседна Франција, каде што живее, објави АП.

Германската државна полиција и специјалисти од единицата за тактички одговор биле вклучени во операцијата, соопштија обвинителите.

Германските власти соопштија дека осомничениот наводно припаѓа на „радикалниот исламски спектар“ и дека добил неколку упатства за изработка на импровизирана бомба и запалива направа, како и како да ги сподели со други, пренесува Танјуг.

Тој беше на пат кон Германија да купи автоматска пушка, додаваат обвинителите.

Полицијата му ги заплени мобилниот телефон и парите на младиот човек, кои тој наводно имал намера да ги користи за да купи оружје, а неговата куќа во германскиот град Кел била претресена.