Гастро марифети Маја Стефаноска, вработена во „Слободен печат“: Рачно извезени рецепти од тефтерчето на Маја
Низ рубриката Гастро марифети, досега поминаа дузина жени и девојки – махерки во кујна, кои готвеа по три рецепти за вас и за нас. И редно беше и ние да си ги покажеме вештините, а кога е Маја со нас, си немаме гајле.
Секогаш насмеана и многу вредна, нашата колешка Маја Стефаноска ни е главен советник кога се во прашање домашните гастро марифети резервирани за после работа.
– Мајааа, а колку вода да ставам во леќата, ама точно да ми кажеш колку на цела ќесичка леќа? А на пола ќесичка, колку? А моркови да ставам? Колку?! Поголеми или помали?!…
Да, да има и такви таленти меѓу нас кои си бараат прецизни мерки. Толку прецизни што понекогаш треба и да им се нацрта дозата, формата, големината на намирниците, тенџерето сосе капак, тавата… Маја пак, има нерви-кабли, а има и едно волшебно тефтерче во кое се запишани, рачно, гастро волшепствата кои се чувари на македонската традиција.
Ѝ „украдовме“ три рецепти од тефтерчето, извезени со ракописни кирилични букви. Која убавина!
Чоколадна торта
Намирници:
- 400 грама чоколадо
- 100 мл вода, 1 маргарин
- 250 грама шеќер во прав
- 10 јајца
- 10 лажици брашно
- 200 грама мелени ореви.
Подготовка:
400 грама чоколадо се топи во 100 мл вода на тивок оган. Маргаринот и шеќерот во прав убаво се матат и се додаваат 10 жолчки. Откако ќе се излади растопеното чоколадо се става смесата со маргарин.
Пандишпан: 10 белки се матат со 10 лажици шеќер, се додава 10 лажици брашно, 200 грама мелени ореви и 1 пециво. Од чоколадната смеса се додава 5-6 лажици фил, се меша и се става да се пече.
Проја
Намирници:
- 1 чаша (200 грама) пченкарно брашно
- 1 чаша бело брашно
- 150 гр сирење
- 4 јајца
- 1 пециво
- 100 мл зејтин
- 1 чаша јогурт
- половина кафено лажиче сол.
Подготовка:
Во длабок сад ги кршиме јајцата, ги матиме, сирењето го дробиме со вилушка, ги додаваме двете брашна, пецивото и солта, за да се соединат. Во подмачкан плех се пече 45 минути на 220 степени.
Вртена пита со праз
Намирници:
- 1 кг брашно
- малку квасец
- 1 шолја масло
- 1 лажичка сол
- и вода за да се замеси.
Подготовка:
Од тестото се прават топчиња и одозгора се мачкаат со масло. Се зема едно топче, се развлекува врз чаршав, па одозгора се попрскува со масло и се додава претходно испржен праз, потоа се витка. Питата се пече во загреана рерна.