Поранешниот израелски министер за одбрана Јоав Галант го нарече премиерот Бенјамин Нетанјаху лажливец и го обвини дека измислува лажна приказна за нападот на Хамас на 7 октомври 2023 година, со цел да избегне одговорност.

„Никогаш не помислив дека ќе треба да дојдам тука во студиото и да кажам дека имаме лажливец за премиер.Премиерот е лажливец“, рече Галант во интервју за Канал 12, според „Тајмс оф Израел“.

Галант го обвини Нетанјаху дека ги поттикнува министрите од неговиот кабинет против шефовите на безбедносните сили на Израел.

„По огромниот неуспех на 7 октомври, кога Израелските одбранбени сили (ИДФ) и безбедносната агенција Шин Бет, предводени од началникот на Генералштабот и шефот на Шин Бет, се бореа храбро, кога беа на фронтот, Нетанјаху им забоде нож во грб и ги поттикна сите владини министри против нив и сето ова го презентираше на јавноста“, тврди Галант.

Галант, кој беше отстранет од функцијата министер за одбрана кон крајот на 2024 година, го обвини Нетанјаху дека тврди дека доцнењето на влегувањето на ИДФ во градот Рафа во Газа на почетокот на 2024 година се должи на наводниот страв на раководството на ИДФ.

„Првиот приоритет на Нетанјаху е тој самиот, потоа неговата влада, а потоа земјата – вели Тој. Ако не успеат, тоа е одговорност на некој друг“, рече тој.

Галант поднесе оставка од своето место во израелскиот парламент, Кнесетот, во јануари 2025 година, неколку месеци откако Нетанјаху го отпушти од неговиот кабинет по втор и последен пат кон крајот на 2024 година, објави Танјуг. Партијата Ликуд оттогаш покрена постапка за исклучување на Галант од своите редови.

Израелскиот опозициски лидер го обвинува Нетанјаху за манипулирање со тајни документи

Во меѓувреме израелскиот опозициски лидер Јаир Лапид го обвини премиерот на земјата Бенјамин Нетанјаху за намерно манипулирање со доверливи документи и заблудување на јавноста во врска со нападот на Хамас врз Израел на 7 октомври 2023 година.

Лапид тврди дека Нетанјаху се обидел да ја отстрани секаква одговорност за нападот со менување на разузнавачките материјали, објави „Тајмс оф Израел“.