Францускиот истражувач Лоран Винатје, кој отслужува тригодишна затворска казна во Русија, сега е обвинет за шпионажа, покажаа судските документи објавени вчера.

Според документот до кој дојде агенцијата Франс Прес, Винатје ќе биде изведен пред суд, овој пат за шпионажа, обвинение кое носи затворска казна до 20 години.

Рочиштето е закажано за 25 август.

Лоран Винатје, кој работеше за швајцарска невладина организација која посредува во конфликти, е меѓу „западњаците“ уапсени во Русија во последните години, во услови на дипломатски тензии околу војната во Украина.

Париз побара негово ослободување, обвинувајќи ја Русија дека држи западни граѓани како заложници. Винатје беше прогласен за виновен за собирање информации за руски системи за оружје и за кршење на законот за „странски агент“ со тоа што не се декларираше како таков.

Винатје работел како консултант во Центарот за хуманитарен дијалог со седиште во Женева и е експерт за прашања што се однесуваат на Русија и другите поранешни советски републики. Тој на суд изјавил дека во контекст на својата работа „ги претставувал интересите на Русија во меѓународните односи“.