Франција денес ја слави 80-годишнината од капитулацијата на нацистичка Германија и крајот на Втората светска војна во Европа, во присуство на преживеаните француски борци на отпорот, претседателот на Француската Република Емануел Макрон и премиерот Франсоа Бајру.

Франција придава големо значење на крајот на Втората светска војна (8 мај е официјален празник), не само затоа што почетокот на крајот се случи со истоварувањето на сојузничките сили на нејзина територија – во Нормандија , туку и затоа што на 8 мај тие беа меѓу големите победници во војната кои беа присутни за време на капитулацијата на Германија.

Прославите започнаа во раните вечерни часови со положување венци од страна на претседателот Макрон на статуата на генералот Де Гол, а потоа и на Споменикот на незнајниот војник – кај Триумфалната капија. Потоа францускиот претседател, по краткиот говор, ќе му додели медал на 98-годишниот француско-еврејски борец на отпорот Жан Даковски.

Во прославите ќе учествуваат и воени оркестри од пет земји: САД, Обединетото Кралство, Канада, Камерун и сегашниот сојузник на Франција, Германија. Исто така, ќе учествува и 91-годишната грчко-француска пејачка Нана Мускури , која, како што објави францускиот весник Фигаро, била замолена да ја изведе „Je chante avec toi liberté“ (Пеам со тебе слобода).