Новозеландскиот актер Сем Нил, кој светската публика најмногу го памети по улогите во филмовите „Паркот Јура“ и „Пијано“, почина во Сиднеј на 78-годишна возраст, соопшти неговото семејство, пренесува „Би-би-си“.

Во објава на неговите профили на социјалните мрежи, семејството наведе дека смртта била „ненадејна и неочекувана“. Во соопштението не е наведена причината за смртта.

„Со неизмерна тага семејството на Сем Нил ја споделува веста за неговата смрт во понеделник, 13 јули, во Сиднеј, Австралија. Сем беше опкружен со своето семејство и замина достоинствено, онака како што го живееше целиот свој живот. Загубата беше ненадејна и неочекувана, но утеха претставува тоа што Сем беше без рак. Семејството изразува најдлабока благодарност до персоналот на приватната болница „Свети Винсент“ за нивната исклучителна грижа. Повеќе информации ќе бидат соопштени подоцна, а засега, во име на семејството, ве молиме да ја почитувате нивната приватност додека се справуваат со оваа неизмерна загуба“, се наведува во соопштението.

Нил во 2023 година откри дека му бил дијагностициран ангиоимунобластичен Т-клеточен лимфом, редок и агресивен вид на не-Хочкинов лимфом. Тогаш болеста ја опиша како „жесток облик на агресивен не-Хочкинов лимфом“. По лекувањето со терапија со генетски изменети Т-клетки, во април оваа година соопшти дека повеќе нема траги од болеста.

„Тукушто направивме снимање и во моето тело нема рак. Тоа е навистина извонредна работа“, изјави тогаш актерот.

Во семејното соопштение повторно беше потврдено дека во моментот на смртта Нил бил без рак.

Во текот на својата богата кариера Сем Нил важеше за еден од најразновидните и најпрепознатливите актери од Нов Зеланд. Со леснотија настапуваше и во авторски филмови и во големи холивудски продукции. Најголема светска слава стекна со улогата во „Паркот Јура“, а во филмот „Пијано“ го толкуваше сопругот на ликот што го играше Холи Хантер.

Тој припаѓаше на генерацијата актери и режисери кои стекнаа меѓународна афирмација по подемот на австралиската кинематографија кон крајот на седумдесеттите години од минатиот век. Меѓу најпознатите имиња од тој период се Пол Хоган, Мел Гибсон, Џефри Раш, Расел Кроу, Џејн Кемпион, Питер Вир и Џилијан Армстронг.

Иако целиот свет го доживуваше како новозеландски актер, неговите корени се во Северна Ирска. Роден е во 1947 година во градот Ома, во округот Тајрон, каде што неговиот татко, офицер во Ирската гарда и по потекло Новозеланѓанец, бил распореден на служба.

„Роден сум во Ома, живеевме во Арма, а моето омилено место овде беше плажата Тајрела. Некако мислам дека токму таму пораснав“, изјави Нил во интервју во 2012 година.

До својата седма година живеел во Северна Ирска, по што со семејството се преселил во Нов Зеланд. Подоцна повторно се вратил на своите корени кога во 2013 година ја доби улогата на началник на полицијата од Белфаст во телевизиската серија „Остри капи“.

Тогаш призна дека северноирскиот акцент одамна му исчезнал, бидејќи соучениците во Нов Зеланд го оттурнале од тој начин на говор, па за улогата побарал помош од своите пријатели и колеги Џејмс Незбит и Лијам Нисон за повторно да го совлада.