Пејачката на македонската музичка група „Љубојна“, Вера Милошевска-Јосифовска стана магистер по фолклористика на Институтот за фолклор „Марко Цепенков“ во Скопје.

Таа објави неколку фотографии од бранењето на магистерскиот труд, со тема „Македонскиот вокален мелос во современиот контекст – оживување на една заборавена музика“, на кое присуствувале нејзините блиски роднини, пријатели и соработници. Нејзина менторка во изработката на трудот била професорката д-р Велика Стојкова Серафимовска.

„Моменти од одбраната на мојот магистерски труд и досегашно истражување на тема ‘Македонскиот вокален мелос во современиот контекст – оживување на една заборавена музика’, а во нив прегратките на моите сакани луѓе, соработници, ученици и ценети професори.

Му благодарам на моето љубовно и неуморно семејство за ветерот во грб и поткрепата, на мајка ми Лидија Милошевска, на брат ми Горјан Милошевски, на мојата сакана фамилија што секогаш ме држи на дланка. А, верувајте – многу сме.

На драгата Анастасија Илиевска за прекрасниот дизајн на презентацијата, на Јане Божиновски за преведувачката асистенција и другарството, како и на проф. д-р Мирјана Мирчевска и на Институтот за етнологија и антропологија што ми отстапија просторија за одбрана.

И, секако, ви благодарам на сите за убавите честитки. Ви испраќам прегратки и ве сакам.

П.С. Недостасува само прегратката на татко ми, кој не доживеа да ме види во вакво академско издание… Си велам, се радуваш од висините тато“, напиша таа на Фејсбук.

„Привилегијата да си пееш на магистерска одбрана“, напиша пејачката.

Интервју со Вера Милошевска-Јосифовска од „Љубојна“: Музичката индустрија од соседството ни ја „превоспитува“ публиката, а нашите медиуми ја прокламираат