Стотици милиони луѓе ширум Азија започнаа со одбележување на Лунарната нова година, со молитви, огномети и свечености, додека Кина официјално ја дочека Годината на коњот – едно од 12-те животни во кинескиот зодијак, што ја наследува Годината на змијата, пишува „Еуроњуз“.

Лунарната нова година, која се совпаѓа со првата млада месечина според лунарниот календар, трае 15 дена и се одбележува меѓу 21 јануари и 20 февруари. Тоа е најважниот годишен празник во Кина и во дел од земјите од Источна Азија.

Очекувани 9,5 милијарди патувања во Кина

Продолжениот празничен период годинава се очекува да даде дополнителен поттик на кинеската економија преку зголемена домашна потрошувачка, што е една од главните цели на Пекинг за оваа година.

Кинеските власти прогнозираат рекордни 9,5 милијарди патнички патувања во рамки на 40-дневниот пролетен фестивал, што е зголемување во однос на 9 милијарди минатата година.

Како и секоја година, централниот празничен телевизиски спектакл на државната телевизија беше централно медиумско случување. Овојпат, хуманоидните роботи повторно беа во фокусот – особено во настапот со боречки вештини, во кој роботи од компанијата „Јунитри роботикс“ изведуваа координирани движења и дури ракуваа со мечеви. Настапот ја отсликува амбицијата на Кина за развој на напредни роботи потпомогнати од вештачка интелигенција.

Тајван, Хонг Конг и Виетнам во празничен ритам

Во Тајван, во храмот Баоан во Тајпеј, храмското ѕвоно одекна 108 пати, број што се смета за среќен. Верниците палеа темјан, се поклонуваа и оставаа цветни аранжмани како дарови.

Во Хонг Конг, традиционално на полноќ граѓаните се редат пред храмовите за да упатат желби за новата година, палејќи снопови темјан.

Во Виетнам, каде празникот е познат како Тет, прославите започнаа со одбројување и концерти на отворено, проследени со спектакуларни огномети во повеќе градови. Светлосни проекции ги осветлија мостовите и облакодерите, додека публиката аплаудираше во ритам со поп-настапите во живо.

Прослави и во Москва и Буенос Аирес

Празничната атмосфера се почувствува и надвор од Азија. Во Москва започна двонеделна програма со кинески улични фестивали, штандови со традиционална храна, црвени фенери и декорации со змејови. Ова е третото по ред одбележување на Лунарната нова година во руската престолнина, во период кога односите меѓу Кина и Русија се зајакнуваат.

Во Буенос Аирес, илјадници Аргентинци се собраа во кинескиот квартал, каде присуствуваа на демонстрации на боречки вештини и традиционални танци со змеј и лав. Кинеската заедница во Аргентина брои повеќе од 180.000 луѓе и се смета за една од најдинамичните имигрантски групи во земјата.