Трансродовите лица во Македонија одбиваат да бидат замолкнати и продолжуваат со својата битка да бидат интегрални членови на општеството. Доказ за тоа е и петтиот последователен марш за видливоста на транс луѓето што денеска се одржа во Скопје.

Под мотото „Маршираме храбро“, граѓанската иницијатива за заштита и унапредување на правата на трансродовите лица ТрансФормА заедно со трансродовите лица, активистите и нивните поддржувачи денеска пред владата побараа иднина каде трансродовите лица можат да живеат отворено, безбедно и достоинствено.

– Видливоста е од суштинско значење во борбата за правата на трансродовите лица, особено во незадоволно либерално и прилично затворено општество како македонското. Видливоста е вистински предизвик за стереотипите, ги разобличува заблудите и придонесува трансродовите луѓе да бидат прифатени како луѓе, порачаа од ТрансформА.

И покрај веќе постигнатиот напредок, тие велат дека не може да се игнорира ширењето страв што го предизвикуваат конзервативните анти-родови движења.

– Овие движења се обидуваат да ги поткопаат правата и достоинството на трансродовите лица преку правење лажна паника, предизвикување дискриминација и сеење омраза. Мора да ја отфрлиме оваа штетна реторика и да ги поддржиме вистинските семејни вредности – емпатија, разбирање и безусловна љубов.

Маршот се организира во пресрет на 31 март – Меѓународниот ден за видливост на трансродовите лица.

„TрансФормА“ се приклучува по шести пат и петти марш кон глобалната акција за солидарност со трансродовите лица, со цел намалување на насилството и дискриминацијата со кои секојдневно се соочува оваа маргинализирана група.