Во малата сала на Македонската филхармонија синоќа се одржа долгоочекуваниот концерт на хрватската поп-ѕвезда Весна Писаровиќ, која по долги години пауза од поп-музиката, за првпат запеа пред македонската публика.

Вечерта беше изполнета со носталгија и чиста емоција, во која Весна ги отпеа најголемите хитови од крајот на 90-ите и 2000-тите, песните со кои пораснаа многу генерации.

Повеќе од два часа, присутните во салата ги пееја како едно големите хитови меѓу кои се добро познатите „Да знаш“, „Јутро доноси дан“, „Сасвим сигурна“, „Доље на кољена“, „Нитко није крив“ и култната дуетска песна со Владо Јаневски, „Љубав је религија“.

Воодушевена од пречекот на публиката Весна откри дека потрошила многу часови подготвувајќи говор на македонски јазик, но преплавена од емоции на крај тремата го направила своето, не успеа на македонски да го каже она што го учела. Но и покрај тоа по секој громогласен аплауз, таа искрено и со насмевка велеше „Благодарам“, со што ја потврди нејзината скромност и почит кон фановите.

Дека ова не е само уште едно обично гостување, покажа и моментот кога на сцената ѝ се придружи нејзиниот долгогодишен пријател, нашиот Владо Јаневски. Нивната култна „Љубав је моја религија“ одекна во еден глас со целата сала, создавајќи моменти кои ретко се доживуваат на концерти. Публиката буквално не ги штедеше дланките, а аплаузите одекнуваа долго по секоја отпеана строфа.

Беше тоа ноќ која заслужи безброј аплаузи, автентично музичко патување кое потсети зошто вистинските хитови и искрената емоција немаат рок на траење. Скопје и Весна синоќа си ветија дека следната средба нема да се чека толку долго.

Интервју со хрватската поп ѕвезда Весна Писаровиќ: Мајка ми мислеше дека ми треба психолог, а јас потајно влегував во светот на џезот